صابر سُكر يكتب: إحذر من ضياع فلوسك مع مستريح جديد
تلقيت عدة إتصالات عن توظيف الأموال وكانت روايتهم كلها « لو انا كنت مدى لواحد فلوس علشان يشغلهالى ويدينى كل فتره ربح من الفلوس دى وبعدين اتفاجئت انه اختفى ومش بيرد عليا وكمان عرفت إن فى ناس كتير زى اعمل ايه ؟ مع العلم أنه ماضى على إيصالات امانه وضمانات بالفلوس بتاعتى وكمان أرباحها»!
قبل ما نرد لازم نفهم يعنى إيه توظيف الأموال، القانون حظر تلقي الأموال من الجمهور لتوظيفها واستثمارها أو المشاركة بها إلا من الشركات المقيدة في سجل هيئة سوق المال؛ ونصت المادة ٢١ من القانون ١٤٦ لسنة ١٩٨٨ علي كل من تلقي أموالاً علي خلاف أحكام هذا القانون أو أمتنع عن رد المبالغ المستحقه لأصحابها كلها أو بعضها، يعاقب بالسجن وبغرامة لاتقل عن ١٠٠ الف جنيه ولاتذيد علي مثل ماتلقاه من أموال أو ماهو مستحق منها، ويحكم علي الجاني برد الأموال المستحقة إلى أصحابها.
يعنى لازم شروط معينة يجب توافرها لإتهام شخص بتوظيف الأموال ... طيب إيه الشروط دي؛ من ضمن الشروط لازم تكون فى شركة تمارس نشاط معين تقوم بدعوة عامة للأشخاص بقصد تلقى الأموال لاستثمارها فى نشاطات الشركة مقابل ربح معين متفق عليه ... وبس كده ... لا كمان لازم يكون فى عقد من عقود الإتفاق أو الاستثمار محدد فيها المبلغ إللى أنت دفعه ونصيبك من الربح . وايه كمان؛ لازم كمان الشركة تمتنع عن رد المبلغ إللي أنت دفعته .
طيب لو ماكنش فى عقد بينى ومابين الشركة وأنا عرفت الراجل إللي أخد منى الفلوس عن طريق حد ثقه أعمل ايه! أقول لحضرتك يبقى مش توظيف أموال، حتى لو كنا أكتر من حد وحتى لو كنتم مليون شخص .. لازم تكون فى شركة ولازم يكون فى دعوه لتلقى الأموال .
طيب وفلوسنا ... تقدر تاخدها بكذا طريقة إنما مش عن طريق اتهامه بتوظيف الأموال .
انا حبيت أوضح ببساطه يعنى إيه جريمة توظيف الأموال علشان الناس إلى اتنصب عليها متروحش تتهم الشخص بتوظيف الأموال وتلاقيه فى الآخر اخد حكم بالبراءه! وفلوسهم ضاعت علشان هما مش عارفين إيه الفرق بين جريمة توظيف الأموال
وجريمة النصب المنصوص عليها في المادة ٣٣٦ من قانون العقوبات وحدها الأقصى حبس ٣ سنوات تعاقب من توصل للإستيلاء علي أموال أو سندات أو منقول الغير عن طريق الإيهام بمشروع وهمي وهذه الجريمة تفترض وجود علاقه شخصية ما بين الضحيه و الجاني أساسها الثقه والاطمئنان .
وجريمة التبديد أو خيانة الأمانة الوارده في الماده ٣٤١ من قانون العقوبات التي تعاقب كل من إختلس أو استعمل أو بدد مبالغ أو امتعة أو بضائع أو نقود أو تذاكر أو كتابات أخري مشتمله علي تمسك أو مخالصة أو غير ذلك أضرارا بمالكيها أو أصحابها أو واضع اليد عليها وكانت الاشياء المذكورة لم تسلم له إلا علي وجه الوديعة أو الاجارة أو علي سبيل عارية الاستعمال أو الرهن أو كانت سلمت له بصفته كونه وكيلا بأجرة أو مجانا بقصد عرضها للبيع أو استعمالها في أمر معين لمنفعة المالك لها أو غيره يحكم عليه بالحبس ويجوز أن يزداد عليه غرامة لاتتجاوز مائة جنيه مصري ..
أي خيانة الأمانة هي استيلاء الجاني علي مال منقول مملوك
للغير في حوزته بمقتضي عقد من العقود الوارده بالنص
بخيانة ثقة المجني عليه .
وجريمتي النصب وخيانة الأمانة جنح
أما توظيف الأموال فهي جناية اقتصادية .
